میں تنظیم اسلامی سے پہلے کبھی اشاعت التوحید والسنۃ اور کبھی جماعت اسلامی اور کبھی تبلیغی جماعت اورکبھی تحریک نفاذ شریعت محمدیؐ صوفی محمد ؒ صاحب والی تحریک کے ساتھ وقت لگاتا تھا لیکن کسی بھی جماعت کے ساتھ مستقل وابستگی نہیں تھی پھر ڈاکٹر اسرار احمد ؒ دِیر آئے۔ 1993ء میں ممتاز بخت صاحب اُس پروگرام میں گئے اور وہاں سے ڈاکٹر صاحب ؒ کے کیسٹ لائے جب میں نے سنے تو بات اچھی لگی، وہ خطاب’’ ہمارا دین ہم سے کیا چاہتا ہے؟‘‘ کے موضوع پر تھا ۔1994ء میں پہلے معاون خلافت فارم پُر کیا اور معاون تحریک خلافت بن گیا۔ پھر1995ء میں تنظیم اسلامی کا باقاعدہ رفیق بن گیا۔ اس کے بعد اپنے علاقے میں پروگرام منعقد کرانے شروع کیے۔ خود تقریر کی صلاحیت نہیں تھی۔ لیکن امیر حلقہ صاحب خود بھی آتے تھے اور ساتھ وارث خان صاحب ، خورشید انجم صاحب اور کچھ دیگر رفقاء آ کر پروگرام کرتے اور چلے جاتے  تھے۔ کبھی تیمر گرہ سے محمد فہیم خان صاحب اللہ تعالیٰ صحت عطا فرمائے، آتے تھے اور بی بیوڑ کی جامع مسجد میں پروگرام منعقد کر کےچلے جاتے تھے۔ درمیان میں پھر کافی وقفہ آجاتا تھا تو میں نے اور ممتاز بخت صاحب نے مشورہ کیا کہ ہم کب تک کبھی پشاور سے اورکبھی تیمر گرہ سے رفقاء کو بلائیں گے کیوں نہ ہم خود بیان کرنا شروع کریں۔ اگلے دن ممتاز بخت صاحب کے مکان پر چار پانچ کلاس فیلوزنے مل کر درس قرآن کا پروگرام ترتیب دیا۔ میں نے سورۃ لقمان کے دوسرے رکوع کا درس دیا۔ پہلے درس دینے کا کوئی تجربہ نہیں تھا۔ پانچ بندے تھے ۔ میں جب اُن کے سامنے درس دینے لگا تو یقین جانئے کہ سرد موسم میں پسینے سے شرابور تھا۔ اللہ تعالیٰ کے فضل وکرم سے20 منٹ درس قرآن دیا۔ ادھر سے ہمت بندھی تو پھر مسجدوں میںایک دوسرے کی خطاب کی ڈیوٹی لگاتے تھے۔ خطاب کا موضوع ہوتا تھا:’’فرائض دینی کا جامع تصور‘‘ ۔پھر ایک دن نقیب اُسرہ محمد فہیم خان صاحب نے تربیتی پروگرام رکھا اور اُس پروگرام میں ہر رفیق کو بیان کرنے کا کہا۔ اُس پروگرام میں اُس محلے کے لوگ بھی حاضر تھے۔ تمام رفقاء نے اپنے اپنے انداز سے بیان کیا۔ اور میں نے آیت البر پر درس قرآن دیا۔ نقیب اسرہ اور محلے کے لوگوں نے اُس کو پسند کیا اورمطالبہ کیا کہ آپ نماز ظہر کے بعد یہی درس لائوڈسپیکر پر دیں۔ ظہر کے بعد میں نے درس قرآن لائوڈسپیکر پر دیا۔ درس شروع کیا تو لوگ مسجد آنا شروع ہوگئے اور پوری مسجد بھر گئی۔ لوگوں کا رش دیکھ کر میرا حوصلہ بڑھا اور پھر گھر آکر میں نے الہدیٰ سیریز44 کیسٹ کے لیے داخلہ لیا اور جب کیسٹ آنے شروع ہوئے تو پھر کوئی اور کام نہیں کرتا تھا بس وہی کیسٹ سنتا تھا۔ اور گھر میں اکیلا دن رات سوالنامے حل کرتا تھا۔ سب کہتے تھے یہ بندہ کس مصیبت میں پڑ گیا ہے نہ سوتا ہے نہ سونے دیتا ہے۔    میری کوشش تھی کہ یہ کورس جلد مکمل ہو جائے اور انہی دروس کو میں بیان کرنے لگ جائوں۔ بہت جلد میں نے وہ خط و کتابت کورس مکمل کیا۔ پھر ایک عالم نے مجھے خطبہ جمعہ کے لیے کہا۔ جامع مسجد ہمارے گائوں سے کافی دور تھی۔ ایک گھنٹہ پیدل سفرکرنا پڑتا تھا۔ میں خطاب جمعہ میں منتخب نصاب بیان کرتا تھا۔ پھر کچھ گھریلو مسائل پیدا ہو گئے تو میں آرمی میں بھرتی ہو گیا جب آرمی میں ٹرنینگ کے لیے گیا تو وہاں پر ایمان، تقویٰ، جہاد فی سبیل اللہ کی کلاس ہوتی تھی۔ اس کلاس میں بھی مجھے گفتگو کرنے اور بعد میں کلاس پڑھانے کا موقع ملا۔ انہی کلاسوں میں میں نے منتخب نصاب کافی حد تک بیان کیا۔ پھر ٹریننگ پوری ہو گئی اور میں یونٹ گیا تو وہاں پر یونٹ میں بھی خطبات جمعہ کے مواقع ملے۔ آفیسر سے لے کر عام سپاہی تک سب کو تنظیم اسلامی کی دعوت پہنچا ئی۔ اللہ تعالیٰ ہماری سعی قبول فرمائے۔  (رپورٹ: حسین احمد، امیر مقامی تنظیم، بی بیوڑ حلقہ ملاکنڈ)

 

میرے خیال میں تنظیم کے ہر رفیق کے گھر، دفتر اورسواری میں تنظیم کا لٹریچر، کارڈ، کتاب، سٹیکر اور کلینڈر ہونے چاہیے۔ تاکہ دیکھنے والا تنظیم کے بارے میں سوال وجواب کر سکے۔

حلقہ قرآنی یعنی عوامی درس قرآن تنظیم اسلامی کے لیے مقناطیس کا کام کرتا ہے، اس کا اہتمام ہر رفیق کو کرنا چاہیے اس طرح بھی لوگوں کو حق اور باطل کے درمیان فرق معلوم ہوتا ہے یہ طریقہ پھر تنظیم میں شمولیت کا سبب بنتا ہے۔

دعوت میں کسی کو کم تر یعنی اُس کی سوچ کو، اُس کی جماعت کو یا اُس کے لیڈر کو غلط ثابت کرنا پیش نظر نہ ہو بلکہ مکمل خیر خواہی مقصود ہو تو یہ رویہ کافی فائدہ مند ہو گا۔

تنظیم اسلامی کے ہر رفیق سے خندہ پیشانی سے ملنا اور ملاقات پر خوشی کا اظہار کرنا رفقاء کے درمیان تعلق کو مضبوط بناتے ہیں۔ (آفتاب حسین ، نقیب اسرہ کبل، حلقہ ملاکنڈ) 

 

کسی کو دعوت دینے سے پہلے اپنی اصلاح کی کوشش کریں۔ اگر آپ کے اپنے قول وفعل میں تضاد ہو گا تو لوگوں پر آپ کی دعوت کا اثر نہیں ہو گا۔ انفرادی دعوت کے ضمن میں یہ چیزمیرے مشاہدے میں آئی ہے کہ لوگ باتوں سے اتنا متاثر نہیں ہوتے جتنا داعی کے عمل  کو دیکھ کر ہوتے ہیں لہٰذا ایک داعی کو اپنا دامن نہایت صاف رکھنے کی مسلسل کوشش کرنی چاہیے۔دعوت میں تسلسل نہایت اہم ہے چاہے سال گزر جائیں، مہینے میں ایک یا دو دفعہ  زیر ِدعوت احباب سے ملاقات ضرور کی جائے، خلوت میں اس کے لیے دعا کریں اور پھر نتیجہ اللہ پر چھوڑ دیں۔ میں پہلے زبانی دعوت دیتا ہوں، پھر تسلسل کے ساتھ مہینے میں ایک دفعہ صرف ایک صفحہ پر مشتمل دعوت بھی دیتا ہوں۔دعوت میں سب سے پہلے حقیقی اور شعوری ایمان کی طرف توجہ دلانے کی کوشش کرتا ہوں۔(عمران خان، نقیب اسرہ مینگورہ، حلقہ ملاکنڈ)

میں نے مسجد میں اعتکاف میں بیٹھے نوجوانوں سے ملاقات کی اور ان سے صحابہ کرام ؓ کے واقعات Share کیے۔ان کو سیرت کی کتاب تحفتاً دی تاکہ اعتکاف میں پڑھیں۔ اللہ تعالیٰ کی توفیق سے تقریباً 4 افراد کو حلقہ قرآنی سے جوڑا ۔ ایک دفعہ ایک نوجوان کو مسجد میں نماز پڑھتے ہوئے دیکھا۔نماز کے بعدان سے گفتگو ہوئی ۔ اپنا اور تنظیم اسلامی کا تعارف کروایا ۔ انہوں نے بتایا کہ میں ڈاکٹر اسرار ؒصاحب کو سنتا ہوں۔ ان کی حوصلہ افزائی اور راہنمائی کی۔انہوں نے دورہ ترجمہ قرآن میں شرکت کی۔(اسجد فاروق)