تنظیم اسلامی حلقہ وسطی کراچی کا کُل رفقاء رفیقات تربیتی اجتماع امپیریئل بینکوئیٹ گلشنِ اقبال میں صبح 9:00 تا 11.30 بجے منعقد ہوا۔ نظامت کی ذمہ داری حلقہ وسطی کے ناظمِ تربیت جناب فیصل منظور نے ادا کی۔

 اجتماع کا آغاز تلاوت و ترجمہ قرآن پاک سے ہوا، سعادت قاری حاشر ذکی خان نے سورۃ لقمٰن کے رکوع 2 کی تلاوت کرکے حاصل کی۔دروس کا اختصار ذیل میں ہے:-

(1) تربیت ِاولاد سورۃ لقمٰن رکوع 2 کی روشنی میں۔ محترم اسامہ جاوید عثمانی نے تربیت ِاولاد کی اہمیت کو اجاگر کرتے ہوئے فرمایا کہ اس سورۃ میں اللہ تعالیٰ نے انتہائی جامع انداز میں حضرت لقمان کی وصیت کو بیان کیا ہے جو اپنے فرزند کو کی تھی۔ اس ضمن میں 10 نکات کو 3 اعتبارات کے حوالے سے تقسیم کیا ہے جو کہ ایمان، اقدار اور رویہ ہیں۔ان اعتبارات کا آپس میں ربط یہ ہے کہ اگر محض رویہ پر کام ہو تو باقی دو پر کوئی اثر نہیں ہوتا، اگر صرف اقدار پر کام ہو تو رویہ پر تو اثر ہوتا ہے لیکن ایمان پر اثر نہیں ہوتا، البتہ اگر ایمان پر کام ہو تو باقی دونوں اعتبارات ایمان کے تحت اثر پذیر رہتی ہیں۔ جنابِ لقمان کو اللہ نے حکمت عطا کی یعنی حقیقت تک محض فطرتِ سلیمہ کے ذریعے پہنچنے کی صلاحیت ،جس کا اولین مظہر شکر ِ الٰہی ہے۔ تربیت کے حوالے سے واضح کیا کہ اس کی بنیاد والدین و اولاد کے مابین شفقت و محبت اور بھروسا پر ہے جس کا آغاز والدین کو کرنا ہوگا  وہ اس طرح کہ اولاد کے لیے بہترین دوست والدین کو بننا ہوگا۔ حضرت لقمان کی وصیتوں کو بیان کرتے ہوئے فرمایا کہ پہلی وصیت شرک سے پرہیز ہے یعنی توحید پر مبنی ضابطہ ِ حیات کو اختیار کرنا۔ دوم یہ کہ والدین کی خدمت کرنا جس کے لیے والدین کو اپنی اولاد کے لیے عملی نمونہ بننا ہوگا۔ سوم یہ کہ اللہ کی طرف یکسو لوگوں کی صحبت و اتباع خود بھی کرنی ہے اور اپنی اولاد کی صحبتوں پر نظر بھی رکھنی ہے۔ چہارم یہ کہ ہر عمل حتٰی کے ذرہ برابر عمل بھی اللہ کی نگاہ سے اوجھل نہیں رہ سکتا اور اس کی جزا یا سزا  مل کر رہے گی۔ پنجم یہ کہ بندگی ِ رب کے ضمن میں نماز کا قائم کرنا، امر بالمعروف و نہی عن المنکر کرنا اور حق کی راہ میں مصیبت پر صبر کے لیے سنجیدہ رویہ اختیار کرنا ہوگا۔ ششم یہ کہ معاملات کے حوالے سے اترانے سے اجتناب، عجز و انکساری پر کاربند رہنا ،  چال میں میانہ روی اور آواز میں پستی اختیار کرنا اعلیٰ ظرف کے حامل رویوں کی علامتیں ہے۔

(2) دورِ حاضر میں جہاد کے میدان۔ محترم راشد حسین شاہ نے سورۃ العنکبوت آیت 69 کا حوالہ دیتے ہوئے فرمایا کہ جہاد کے معانی کوشش سے کوشش کا ٹکراؤ ہے اور جہاد فی سبیل اللہ کا مفہوم ہے کہ باطل دین کے مقابلے میں اللہ کے دین کے لیے جدوجہد کرنا۔  سورۃ الحجرات :15 کا حوالہ دیتے ہوئے فرمایا کہ اس آیت میں جہاد کی اہمیت واضح بیان ہوئی ہے کہ یہ ایمان کا لازمی عنصر ہے اور سورۃ الصف :10 کے تناظر میں واضح کیا کہ جہاد کے بغیر نجات ممکن ہی نہیں ۔جہاد کوئی فرصت کے اوقات کا کام نہیں بلکہ ہر لحظہ و لمحہ کرنے کا کام ہے۔ سوال یہ ہے کہ حضورؐ نے نبوت کے 15 سال تلوار نہیں اٹھائی تو جہاد کس شکل میں کیا؟ جواب یہ ہے کہ ان سالوں میں نظریات کا نظریات سے ، اقدار کا اقدار سے اور رویہ کا رویہ سے ٹکراؤ رہا، اور یہی وہ جہاد تھا جو آپ ؐ نے اُن سالوں میں کیا۔ ہمارےلیے کونسے میدان میسر ہیں جہاد کے لیے؟ سب سے پہلے تو اپنے نفس کے ساتھ کشاکش جو ہر وقت فرار کی راہ کی جانب آمادہ کرتا رہتا ہے۔ دوم موجودہ دور کے نظریات جن کی تشہیر و تنفیذ کے لیے باطل قوتیں پوری طاقت کے ساتھ مال و جان و وقت لگا رہی ہیں، جن کے تحت ایک خیالی دنیا کا تصور بنایا گیا ہے جو انسان کو اپنے آپ سے غافل کر رہی ہے۔ سوم اعمال کے تحفظ کے لیے جہاد ، جیسا کہ موجودہ دور کے لبرل سیکولر اور مغربی تہذیب سے مرعوب دانشور ذبیحہ و حج کے خلاف پروپیگنڈا کرتے ہیں اور ان عبادات کو پیسے کے ضیاع اور جانوروں پر ظلم کے عمل سے تشبیہہ دیتے ہیں۔ دورِ حاضر میں کامیابی کے نئے معیارات متعین کئے جا رہے ہیں مثلاً شہرت ؛ جس کے حصول کے لیے سوشل میڈیا کے ذریعے حیاء کی چادر تک چاک کی جارہی ہے۔ اگلا میدان ہے تصورِ امت کے لیے جہاد: زمانہ میں ایسا ماحول بنایا جا رہا ہے کہ انسان انفرادیت میں غرق ہو کر رہ جائے جس کے لیے انفرادی آزادی جیسے پُر فریب نعرے ایجاد کئے گئے ہیں جبکہ دین ِاسلام اجتماعیت کا حکم دیتا ہے جو ذات کے خول کو توڑے بغیر قائم ہی نہیں ہو سکتی۔ آخر میں فتنہِ دجال کے خلاف جہاد ہے۔ دجالی تہذیب کا سب سے بڑا ہتھیار ٹیکنالوجی ہے اور اس کے سحر نے سب کو اپنی لپیٹ میں لے لیا ہے۔ یہود اپنی نسلوں کو آنے والے جھوٹے مسیح کے لیے تیار کر رہے ہیں جبکہ مسلمان مسحور و مبہوت و محروم ہیں۔ ان تمام میدانوں میں مکمل شعور کے ساتھ جہاد ہماری آخرت کی نجات کے لیے شرطِ لازم ہے۔

(3)جہاد بالمال کی فضیلت و اہمیت۔ محترم انجینئر محمد عثمان علی نے سورۃ الحدید کے تناظر میں انفاق کی فضیلت و اہمیت کو بیان کرتے ہوئے فرمایا کہ سب کچھ رب تعالیٰ کا دیا ہوا ہے اور اسی دئیےہوئے میں سے خرچ کرنے کا حکم ہے۔اس خرچ کرنے کا فائدہ اللہ کو نہیں پہنچتا بلکہ خود انفاق کرنے والے کو پہنچتا ہے۔جو لوگ ایمان رکھتے ہیں اور انفاق کرتے ہیں ، یہی ہیں جو اجر ِعظیم کے مستحق ہیں۔انسان اپنی کوتاہ نظری کے باعث عارضی دنیا میں انویسٹمنٹ کرتا ہے اور اس میں نقصان بھی اٹھاتا ہے لیکن اللہ کے ساتھ تجارت نہیں کرتا جس میں نقصان کا ذرہ برابر بھی خدشہ نہیں بلکہ 700 گنا تک نفع ملتا ہے اور اس کے باوجود اللہ اس انفاق کو اپنے ذمہ قرض قرار دیتا ہے، جس کو اجرِ عظیم کی صورت میں بڑھا چڑھا کر واپس کرے گا ، اور یہی اللہ تعالیٰ کی سنت ہے ۔ سیرتِ نبوی ؐ گواہ ہے کہ آپؐ سب سے بڑھ کر سخی تھے اور جب رمضان آتا تو  سخاوت میں آندھی سے بھی تیز تر ہو جاتے تھے ۔ 

اس اجتماع میں 600  رفقاء و رفیقات اور لگ بھگ 500  احباب و حبیبات  نے شرکت کی۔امیر محترم کی جانب سے دعا پر اس محفل کا اختتام ہوا۔(رپورٹ: سید محمد احمد،ناظم دعوت راشد منہاس جوہر1کراچی)